العيد فرحة

اول يوم العيد... كل عام وانتم بخير... وكالعادة جاء حظى فى ان اعمل فى هذا اليوم المبارك... وكانت احدى المكالمات كالتالى

- كل سنة وانتم طيبين

- وحضرتك طيب

- انتم الدليل

بينى وبين نفسى: ؟؟ امال هو فاكر نفسه مكلم مين

- ايوه يا افندم احنا الدليل

- بس احنا فى العيد... هو انتم بتشتغلوا فى العيد

- حضرتك احنا شغالين كل الايام ..كل الوقت

- يااااه ده انتم بتتعبوا اوى

- تحت امرك – مع المحافظة على الابتسامه، الراجل والله فيه الخير وبيسأل

- عايز رقم فلان الفلانى

بعد ان اعطيته الرقم المطلوب ... انهى المكالمة

- شكرا كل سنة وانتم طيبين

- وحضرتك طيب

وطبعا فضلت اتحسر على حالى انى بشتغل فى هذا اليوم... بس قلت والله لو مكنتش اشتغلت مين كان هيرد عليه؟؟

وواضح ان جميع الناس لا يصدقون اننا نعمل فى العيد... مع انهم اتصلوا وابدوا دهشتهم... فقد جاءت اليوم ايضا مكالمة لاحدى زميلاتى كالتالى

- ايه ده انتم ليه شغالين فى العيد

- عشان نرد على حضرتك يا فندم

وكل سنة وانتم طيبين :)

يا حبايبى يا حلوين

كان واحدا من تلك الايام الممتلئة بمكالمات تليفونية لا تنتهى، وطلبات لكل ما هو غريب وعجيب على ارض مصر... وفى خضم اليوم جائتنى المكالمة التالية

- الو صباح الخير... مريم كمال مع حضرتك

- يا حبايبى يا حلوين

فغرت فاهى فى دهشة وقلت

-نعم

جاء صوت هادئ مبتسم وكانه لا يمت لهذا العالم بصلة قائلاً

- عايز جمعية اصدقاء فريد الاطرش

- مم حضرتك فيه مسرح فريد الاطرش، وكمان فيه حاجة فى قصر النيل ولكن غير مسجل بالظبط نشاطها

-المسرح لأ... ده بأه بتاع جلال الشرقاوى دلوقت

- طيب حضرتك نأخذ العنوان والتليفون الى فى قصر النيل

فسألنى بنفس الصوت اللزج

- طيب هى دى جمعية اصدقاء فريد الاطرش؟

بينى وبين نفسى: لا حول ولا قوة الا بالله... واستجمعت صبرى وقلت

- معرفش والله النشاط غير مسجل عندى

فقال وكله فخر

- انا فريد الاطرش

بينى وبين نفسى: اه ده جايلى انا بأه... كنت هتهور طبعا واقول له وانا سامية جمال ونديها ادى الربيع عاد من تانى، لكنى مسكت نفسى على اخر دقيقة واديته الرقم والعنوان

اخيرا قام السيد فريد بختم المكالمة بالشكر واهدائى انا وزملائى اغنية: ساعة فى قرب الحبييييبب

عن المدونة

اصدقائى الاعزاء

قررت اليوم ان اكتب عن يوميات موظفة تعمل فى دليل تليفونات مصر - 140 دليل

ويعد الحافز الرئيسى وراء قرارى هذا ان الشخصية التى اقدمها هى شخصية حقيقية، الا وهى اختى الصغرى الت

سوف ادعوها فى المدونة باسم مريم كمال... اما الحكايات التى ساقوم بسردها فكلها مواقف حقيقية حدثت لها بالفعل... وقد حاولت مرارا اقناع العزيزة الغالية ان تفتح مدونة لنشر تلك المواقف، ولكن نظرا لانشغالها الدائم فلم تستطع... لذا اخذت على عاتقى القيام بهذا العمل لخبرتى فى مجال التدوين من ناحية، ولثقتى ان المحتوى يستحق النشرمن ناحية اخرى

الهدف الاساسى من هذه المدونة هو رصد للشعب المصرى كما هو بدون شعارات او نقوش ملونة تجميلية، وذلك لمعرفة اهتماماته وطريقة تفكيره واستيعابه للامور، وكيف تؤثر به الاحداث الراهنة.

واليوميات يا اصدقائى عبارة عن مواقف تحدث فى دقيقتين لا اكثر، بعضها مضحك الى حد الهيستيريا، والاخر محزن الى حد البكاء

ماذا ايضاً .... ممم ... لا شئ.... فلنبدأ اذن السرد